Carpon Rarabi Jeung Nyi Sari Eps 5
Karya: Ceu Ningsih
Wiwin tibra deui, tarangna karasa panas ngaheab, pantes rek gering ge, asup angin meureunan. Didin ngarahuh, mun pareng meunang iber ti lembur yen budak hareeng, sok ngarasa hareneg. Watir ka kolot, peupeuriheun keur cageur kudu ngurus sagala rupana, mun keur hareeng kabayangkeun kolot kacida riweuhna. Mun seug boga pamajikan mah Didin moal susah lahir jeung batin.
"Ma, aya bawang beureum?" Didin ka dapur kabeneran indungna geus nyaring.
"Keur naon?" Ma Jojoh kerung bari kurah koreh kana pabetekan.
"Balur Wiwin, hareeng!" Didin nyokot parud jeung pisin.
"Pantes weh, balik burit. Terus milu marhaba, jaba peuting! Keun ku Ema weh!" Ma Jojoh marud bawang, dicampuran minyak keletik.
Ma Jojoh maluran awak Wiwin, panas nyebret jeung loba gundam. Sasambat ka indungna, bari teu nyaho rupa jeung ngaran, ukur nyebut Mamah.
"Tuh Jang! Nepi ka gegeringan kieu hayang boga indung, matak naon mun panggihkeun jeung indungna. Kalah kumaha ge kudu diamprokeun, tong ngagugu wae kanyeri jeung kapeurih, sing nyaah ka budak!" Ceuk Ma Jojoh bari maluran.
"Moal rek diamprokeun Ma, kajaba manehna neangan sorangan, engke geus gede mun rek ngarumah tangga, rek diamprokeun!" Didin rada teugeug, kanyeri kapeurihna acan keneh laas.
Wiwin ngulisik, bray beunta ret ka bapana, "Pa! Can ka dieu mamah teh?"
"Acan geulis, sing sabar! Ke ge aya mulang, pan ku dununganana teu meunang narima telepon!" Ceuk Didin ngalelemu.
Wiwin ngabalieur, baeud bari rambisak. Nyuuh kana bantal, diusapan ku bapana ngadon dikepeskeun.
Geus dibaluran ku bawang beureum mah, panasna rada rerep. Tibra deui sare gigireun bapana. Ma Jojoh laju ka cai rek mapag solat subuh.
Beurangna Wiwin teu pati berag, dahar ge embung, ukur sahuap. Cipanon teu weleh nyalangkrung, cipanon kasono hayang amprok jeung indung, hayang ngarasakeun keukeupna, panyarekna, jeung deudeuhna nu salila ieu ukur implengan. Babaturan sakolana nyalampeur ulin ge teu dipalire, puguh ge keur gering, boro-boro hayang ulin, ukur diuk meueusan ge geus teu kuateun.
"Bawa ka dokter Jang!" Bah Rukma hariwangeun.
"Nya Bah, pasosore weh!" Ceuk Didin.
Dibawa ka dokter pasosore, ngahaja nginjeum mobil nu uwana, disetiran ku sorangan. Nepi ka dokter teh ngantay, teuing jam sabaraha dipariksana, mangkaning euweuh deui dokter di wewengkon eta mah, ngan hiji-hijina.
Didin ngahuleng, rek nungguan bakal peuting. Ari teu dipariksa, melang ka budak.
"Uih wae Pa! Teu nanaon Wiwin mah!" Ceuk Wiwin noel bapana.
"Pan Wiwin hareeng kudu diubar, ari dokterna geuning bari can aya deuih!" Didin ngusapan tarang anakna nu ngaheab.
"Ka puskesmas weh!" Cenah semu peura.
"Nya atuh, urang meser parasetamol weh nya!" Didin unggeuk, kabeneran aya apotek, gancang meuli obat keur nurunkeun panas. Sanggeus meunang ubar, Didin mulang deui ka lembur.
"Pa ari karembong tea mana?" Wiwin luak lieuk.
"Eta dina kantong!" Didin nuduhkeun kantong.
Kantong dikorehan, karembong dicokot dibeulitkeun kana beuheung Wiwin. Tisaprak manggih karembong, Wiwin tara tinggaleun mamawa. Mun teu ditiungkeun, sok dibeulitkeun kana cangkeng.
Mobil maju lalaunan, paur ari mawa mobil batur mah. Heg jalan goreng, jaba mobilna mobil heubeul. Palias mun nepi ka mogok teh, bakal nepi peuting ka imah. Didin asa geus tarapti milihan jalan, na ari gejlig teh manggih lombang, atuh mobil teu bisa maju.
"Astaghfirullah, aya-aya wae nya!" Didin kacida hanjeluna.
"Kunaon Pa?" Wiwin kerung.
"Mogok Win!" Didin nyetater deui mobil, angger teu maju.
Wiwin ngerelek heuay, reup sare. Bapana anteng ngoprek mesin mobil, keur uprak oprek, aya nu noel ti tukang.
"Peryogi bantosan Kang?" Cenah sorana halimpu.
Didin ngalieuk, gebeg reuwas kacida, "Nyai?" Cenah bari ngadegdeg.
Nyi Sari imut, pipilueun ngoprek mesin mobil, "cobi hirupan Kang!"
Didin ngagugu, mobil dihirupan anehna maju deui, Sari geus diuk gigireun bari ngalahun Wiwin nu keur ngageubra bari nyusup kana pinareup Sari bangun nu nyelegon.
"Rieut nu geulis teh?" Sari ngusapan tarang Wiwin.
"Enya! Dokterna can aya, pasen geus numpuk! Mulang deui weh!" Ceuk Didin bari nyetir, teu cara tisasari rasa keueung teu nyampak, punduk teu muringkak deui.
"Enjing ge damang Su! Abdi baris nepangan, ngawujud manusa, geus cunduk kana waktuna ninggang kana mangsana, Wiwin pinanggih jeung kahayangna!" Sari imut, gep leungeuna nyekel pageuh kana leungeun Didin.
Didin males imut bari unggeuk, "mangga Nyi, urang silih bantuan! Mun enya aya rasa nyaah ka abdi jeung budak, poma ulah aya niat ngarogahala!"
"Moal Kang! Kacinta nu ikhlas bakal ngarobah takdir, wates naon wae nu ngahalangan urang, moal kuat misahkeun, lamun hate urang papada ikhlas micinta!" Sari ngareret, imutna teu lesot.
Mobil maju jiga nu kabawa angin, ngan sakiceup geus nepi ka imah. Reg eureun hareupeun gang, Didin ngalieuk ka gigireun, Sari geus ngiles ninggalkeun seungit malati nu teu weleh nyambuang.
Wiwin ngulisik, "Mamah? Kamana? Bieu aya?"
"Isuk cenah Win! Geus kaimpi wae mah tereh ka dieu geura!" Didin seuri bari markirkeun mobil, asup ka buruan nu boga mobil.
"Nuhun Wa!" Didin ngasongkeun konci mobil ka uwana.
"Sami-sami Jang, naha meni tereh ti dokter teh?" Uwana kerung.
"Teu tulus Wa! Pinuh jaba dokterna can datang!" Ceuk Didin.
"Euh kumaha atuh?"
"Ah isuk ge cageur Wa! Hayu Wa, mulang heula bisi kaburu peuting!" Didin amitan.
Nepi ka imah, Wiwin hariweusweus ngimpi panggih jeung indungna. Kaciri berag jeung jigrah, dibeja-beja ka ninina jeung akina, yen indungna balik isuk.
"Nyaan Jang?" Ma Jojoh ngaharewos.
"Tempo weh isukan Ma, bakal aya nu datang, Wiwin geus nganggap indung!" Tembal Didin sarua ngaharewos.
"Si Ipah lain?"
"Lain! Babaturan gawe!" Didin ngabohong.
"Sukur atuh, Ema mah moal rek pipilueun, maneh nu ngarandapan! Komo geus boga pangalaman dinyenyeri mah, biasana sok ati-ati! Rek urang mana wae ge heg!" Ma Jojoh ngagabrug, ceurik atoh ngadenge anakna rek ngamimitian rarabi deui.
"Piduana Ma!" Didin ngalimba, bari neuteup Wiwin nu keur suka bungah rek mapag indungna isukan.
Isukna, Ma Jojoh pak pik pek di pawon, imah diberesan da rek aya piminantueun nganjang ka imah. Sakitu dicarek ku Didin ulah sagala dijieun, angger weh nu ngarana indung mah haat sasadiaan.
"Pan rek aya nu namu, kudu dimuliakeun! Ngarah meunang pahala!" Ceuk Ma Jojoh, mipit daun sampeu keur lalabeun.
"Muru peuting Ma kadieuna ge, piraku rek disuguhan liwet jeung asin? Can puguh didahar!" Ceuk Didin bari mesem.
Nu elekesekeng mah Wiwin, geus teu sabar hayang panggih jeung Sari. Geus wawar ka tatangga jeung babaturanana, rek aya indung anyar nu bakal ngaganti indung tegesna.
"Mugia nyaaheun ka Wiwin!" Ceuk babaturana.
"Aamiin, pasti atuh!" Tembal Wiwin atoh.
Nepi ka adan Asar, nu ditutungguan can datang, Didin geus hariwang sok sieun Sari teu jadi nganjang. Rek nelepon, kamana neleponna? Teu puguh dumukna. Mangkaning sagala geus dijagragkeun keur mapag Sari.
"Boa ngabohong Jang!" Bah Rukma hariwang.
"Dagoan wae Bah! Bisi keur dijalan!" Ceuk Didin bari sarua hariwang.
Dur adan Isya, Sari suwung. Nu di imah geus teu genah cicing, sieun nu nganjang bolay. Antukna saeusi imah ngahuleng di tepas.
Nepi ka wanci sareureuh kolot, nu di tepas ngampih, karek ge carengkat rek abus ka imah, kadenge sora delman, kuda ngahiem jeung sora kikirincingan. Dituturkeun ku angin nu handaruan, ngagelebugna ukur disabudeureun imah Didin. Beuki lila angin ngalaunan, delman eureun hareupeun imah.
"Tuh geuning!" Ma Jojoh curinghak, ngan ngadadak pias nempo nu turun tina delman.
Belum ada tanggapan untuk "Rarabi Jeung Nyi Sari (Bag 5)"
Post a Comment
Dilarang membagikan link judi, pornografi, narkoba, dan kekerasan. Terimakasih.