Rarabi Jeung Nyi Sari (Eps 8)
Karya: Ceu Ningsih
"Kela Jang! Kumaha dongengna ieu teh?" Ma Jojoh curinghak, lain ukur Didin nu dipikamelang, tapi pangpangna mah Wiwin incuna.
"Teu aya ka pabrik Ma! Teu aya laporan, naha cuti atanapi kumaha!" Tembal Dudung, ret ka Ipah.
Ipah tungkul, era. Lalakon hirupna jeung Didin geus papada nyaho, kaasup batur gawena di pabrik.
"Ah piraku, jadi melang ka budak! Bisi kumaha onam!" Bah Rukma ngarasa tagiwur.
"Urang mana atuh awewena Bah? Lemburna di mana? Piraku teu nyaho!" Ipah rada teugeug, inget ka budak, milu manghariwangkeun.
"Nyaeta, Abah ge hemeng, datang ka dieu sorangan, caritana rek dirapalan, tapi Abah jeung Ema teu meunang nyaksian! Rek nyusul, nyusul kamana?" Bah Rukma ngeluk.
"Euh, pan ngaran kawin mah kudu aya susuratan heula! Meh puguh imah balena!" Tembal Ipah.
"Ke sakedap Bah! Kang Didin dirapalan tapi teu aya nu jajap? Diantos iberna saenggalna, mugia teu aya nanaon!" Ceuk Dudung bari jung nangtung laju amitan.
Ipah asa boga tanjakan, rek nganahakeun budak nu dibawa ku indung terena, "abdi mah melang ka anak Bah! Paluruh, bisi kumaha onam!"
"Enya eta ge Nyi, sabar heula anan!" Bah Rukma surti.
"Dahar heula Nyi, aya timbel urut ngored weuteuh keneh!" Ma Jojoh muka keresek eusi timbel.
"Nuhun Ma! Permios heula, bisi kaburitan!" Ipah nangtung, sasalaman.
*
Sanggeus dirapalan bari jeung euweuh nu nyaksian, Didin jeung Sari cicing di hiji imah nu agreng. Nenggang jeung imah nu sejen, imah di tengah sawah, boro-boro asup mobil, motor ge moal bisa ngaliwatan galengan sawah. Didin geus teu digawe di pabrik, ayeuna mah kasab kana dagang. Ngiderkeun baju jeung ngiriditkeun parabot. Indit mulang tara tangtu, sakapeung saminggu iang parabot nu paresen.
Wiwin diasuh ku Sari, dibaturan ku nu babantu. Sakola jiga biasa, ngan anehna teh beurang mah imah tiiseun jiga imah kosong. Mun peuting kakara haneuteun. Sari mun beurang tara kaciri, bebeja mah ka Wiwin digawe mulangna sore. Matak muruhkeun nu maturan ari sakalieun bapana teu balik ti panyabaan.
"Neng Win, Mamah teh damel dimana?" Aisyah mu maturan Wiwin nyampeurkeun.
"Duka Teh! Abdi ge teu terang, saurna mah damel di restoran!" Tembal Wiwin.
"Tapi asa teu libur nya?" Aisyah kerung.
"Muhun Teh! Abdi ge teu ngartos ah!" Wiwin imut.
"Neng Win, Teteh bade uih ayeuna nya, da aya bapa!" Aisyah amitan.
Wiwin unggeuk.
Aisyah ngaleos di lawang panto pasanggrok jeung Didin nu karek jol ti panyabaan.
"Pa permios bade uih heula!" Ceuk Aisyah.
Memeh Aisyah mulang, Didin mere amplop keur gajihna unggal dua minggu sakali. Amplop ditarima, Aisyah ngaleos.
"Pa, ari Mamah sok kamana wae? Siang mah tara aya, wengi hungkul ayana!" Wiwin nyampeurkeun bapana.
Didin rada ngahuleng, naon pijawabeun. Tisaprak ngahiji jeung Sari, ngan peuuting hungkul panggihna, memeh adan Subuh geus ngiles. Teu loba tatanya, da meureun kitu hukumna, bangsa lelembut mah cenah sok eleh ku panonpoe, wallahualam.
Nyaan weh, bada Isya Sari nembongan, datang jiga nu tos nyaba. Asup ka imah atawa kaluar ti imah euweuh nu nganyahoankeun. Dina rarabi jeung Didin, estu teu guyub jeung ilaharna nu ngarumah tangga, teu sapatemon. Ngan ukur bisa rerendengan hareupeun Wiwin.
"Kang! Geuning tos di lembur?" Sari imut.
"Mah! Wiwin ge hoyong gaduh dede! Jadi aya rencang, teu keueung teuing!" Wiwin ngalendean ka Sari.
Didin jeung Sari silih reret, kumaha pijawabeun? Bingung nyanghareupan kahayang budak nu pamohalan bisa dicumponan. Mun dijentrekeun moal ngarti, dina ngartina ge balukarna ka budak bakal nyerieun hatena asa dibohongan.
"Engke mun Wiwin geus SMA, ngarah bisa ngasuh!" Didin ngusapan.
"Enya atuh, Minggon payun aya rapat di sakola, Mamah kedah ka sakola nya!" Ceuk Wiwin ngareret ka Sari.
Sari ngareret deui ka Didin, "ku bapa wae, Mamah pan damel!"
"Euh, ku bapa wae ah! Sakali-kali atuh ku Mamah!" Wiwin baeud.
"Teu tiasa libur bageur!" Sari ngadeukeutan Wiwin bari nyiuman.
Isukna Wiwin indit sakola rada baeud, kahayangna mah indung nu nganteur atawa nyadiakeun sasarap ari isuk-isuk.
"Ku Bapa anteur? Da Teh Aisyah mah moal ka dieu jigana!" Didin ngaharewos ka anakna.
"Wios Pa!" Wiwin sun tangan laju ngaleos indit ka sakola jeung babatura nana.
Wiwin ngaleos jol Aisyah, "Pa Didin, abdi neda dihapunten, ti kawit ayeuna moal tiasa ngarencangan di dieu, tapi aya gentosna pun alo ti landeuh. Enjing ka dieuna, ku abdi tos dipapagahan da!"
"Oh kitu nya Teh! Nya teu nanaon, mun bisa mah rada nyubuh ka dieuna, abdi memeh adan rek ka kota deui!" Ceuk Didin.
Aisyah ngahuleng, heg jauh lembur alona teh, "kumaha pami piwarang engke wengi ka dieu, tebih lemburna Pa! Hawatos nyubuh ka dieu mah!"
"Nya kumaha hadena wae, ieu konci imah, bisi Bapa kasarean!" Didin mikeun konci imahna.
Aisyah unggeuk, manehna ngaleos deui bari mamawa konci imah Didin. Biasa ge mun dititah ngendong sok mawa konci imah, asup jalan dapur. Imahna lega, sakapeung sapoe jeput tara panggih jeung nu boga imah, Aisyah milih cicing di kamar pembantu bari lalajo tipi. Sabenerna mah ngeunah gawe teh, gajihna gede bari ukur maturan Wiwin. Ngan duka kumaha, aya rasa sieun jeung keueung, komo kungsi ngendong di imah eta, keur kakara teh panggih jeung Sari, bet nempona asa kukurayeun.
Imah Didin geus narutup, reup Magrib ngararingkeb jiga nu embung kaanjangan, Wiwin keur diajar ngaji di musola jeung bapana.
Rengse ngaji Didin nyarita yen aya gaganti Aisyah nu bakal maturan Wiwin lamun keur areuweuh, peuting ieu rek ngendong da bapana muru subuh ka kota.
"Alona Teh Aisyah, bageur cenah! Engke ku Wiwin papagahan weh!" Ceuk Didin, jung cengkat muru ka tengah imah, dituturkeun ku Wiwin.
Di tengah imah kasampak Sari geus aya, Didin ngadongengkeun ngeunaan nu maturan Wiwin.
"Nya kumaha saena Kang! Wios ku abdi diantosan, bilih bade leleson mah mangga!" Ceuk Sari, rek nangkeup ka Wiwin, ngan Wiwin ngised pundung keneh.
"Pa, Win bobo heula! Enjing latihan upacara!" Wiwin ngagadeud bari ngadilak ka Sari.
Sari mesem, beungeutna nu pias kacaangan ku bulan, kabeneran keur caang mabra, "Kang! Kadieu sakedap!" Sari ngagupayan.
Didin nyampeurkeun, "aya naon Nyi?"
"Aya iber nu ngagumbirakeun, abdi bakal ngawujud jadi manusa sajati, citresna Akang jeung kanyaah Akang nu nguatkeunana, nuhun Kang!" Sari imut kareueut.
Didin ngarasa bingung, kudu atoh atawa sabalikna. Sanajan bakal ngawujud jadi manusa, angger kasebutna urut jurig, Didin teu apaleun yen Sari geus lila maotna.
Peuting beuki jempling, Didin geus tibra, Sari cungelik di tengah imah rek nungguan alona Aisyah.
"Sampurasun! Assalamualaikum!" Sora nu uluk salam di luar.
Sari curinghak, jung nangtung ngageuleuyeung muru panto hareup, bray dibuka, "saha nya?"
Belum ada tanggapan untuk "Rarabi Jeung Nyi Sari (Bag 8)"
Post a Comment
Dilarang membagikan link judi, pornografi, narkoba, dan kekerasan. Terimakasih.