Rarabi Jeung Nyi Sari Part 12
Karangan Ceu Ningsih
Nyaan we, rengse maca Yaasiin hujan ngagebret jiga nu dicicikeun ti langit, dibarung ku angin jeung dor dar gelap matak keueung. Hadena aya saung keur ngiuhan.
"Pa Ustad, abdi neda pitulung!" Ceuk Ipah nu kabeneran ngiuhan paduduaan jeung Ustad Amar.
"Teteh ulah nyebat pa ustad atuh, Akang wae!" Walon Ustad Amar bari ngadegdeg kabulusan.
"Muhun Kang Ustad, pami teu kaabotan abdi nyuhunkeun dijajap ka hiji lembur, hoyong mapageun pun anak!" Ceuk Ipah semu era.
"Kumaha dongengna Teh? Naha ka abdi?" Ustad Amar kerung.
Derekdek Ipah ngadongeng, ti mimiti pepegatan jeung Didin, nepi ka dicaram panggih jeung budak. Dipikangewa ku kulawarga Didin, jeung lalampahan Ipah neneangan anakna. Nahan rasa kasono, kapeurih jeung katunggaraan, jadi awewe nu geus dicap awewe tukang salingkuh.
"Abdi tos tobat! Tos jangji moal nyieun kasalahan nu sarua! Abdi hoyong nulungan Wiwin keur nebus kasalahan abdi, kumaha wae carana."
"InsyaAlloh abdi mung tiasa ngabantos sakadugana, sing yakin elmu Alloh moal aya nu ngelehkeun!" Tembal Ustad Amar.
Ipah ngarasa reugreug, rek mercayakeun ka ieu ustad pikeun nulungan Wiwin, sangkan leupas ti pangaruh Sari nu ngamanpaatkeun budak jeung Didin keur males kanyeri ka kulawarga Juragan Karta.
Hujan raat oge, nungtutan arasup ka jero mobil, ti dinya ngajugjug ka imah Bah Rukma. Anita rek ngayakeun tahlil tujuh peuting pikeun Sari jeung bapana. Diayakeun di imah Bah Rukma, sakalian ngondang urang lembur di dinya.
"Masing seueur nya Bah, supados pangdu'ana afdol! Wios waragadna mah ti abdi, Ustad Amar ge nyandak santrina ti pasantren!" Ceuk Anita.
"Mangga Bu!" Bah Rukma unggeuk.
Mimiti peuting ieu rek diayakeun tahlil, urang lembur daratang, nu jauh jeung nu deukeut pada ngadeugdeug rek tahlil. Santri bawa Ustad Amar ngaleut ka imah Bah Rukma. Nepi ka nyieun tenda jeung nyewa korsi sagala.
Bada Isya tahlil dimimitian, Ustad Amar jadi dalangna. Ipah ge milu tahlil, bari hate mah teu jongjon inget ka Wiwin.
Ustad Amar mingpin tahlil, diuk di jero imah Bah Rukma, teu bisa usik kusababa jalma loba nu milu tahlil. Ipah geus teu genah cicing, ngareretan kana jam dina hape, sok sieun Wiwin kumaha onam. Mangkaning Ipah cicing di luar, Ustad Amar di jero. Kumaha rek nganteur nepungan Wiwin, sakalian hayang ngelehkeun Sari. Sugan sasieureun sabeunyeureun, Ustad Amar bisa nulungan.
"Hayu Teh!" Aya nu nepak taktak Ipah ti tukang.
Ipah ngalieuk, "Ustad? Ari itu?" Ipah olohok, ret kanu nepak, ret deui ka jero imah. Sidik duanana ge Ustad Amar, Ipah ngahuleng.
"Hayu, ulah geruh! Keun nu di lebet mah sina jongjon!" Ustad Amar seuri, nempo Ipah jiga nu bingung.
"Naha aya dua?" Ipah kerung.
Ipah dibonceng ku Ustad Amar, motor jiga nu ngahaja dikebut muru waktu. Ipah can dodongeng dimana imah Sari nu dicicingan ku Wiwin. Tapi Ustad Amar mah tapis mawa motor nepi ka palebah galengan sawah.
"Palih ditu nya Teh!" Ceuk Ustad Amar.
"Geuning uninga?" Ipah kerung deui wae.
Ustad Amar ukur keom, motor ditunda disarandekeun kana tangkal nangka nu aya di dinya, "hayu Teh tuturkeun abdi!"
Ustad Amar leumpang pangheulana, bari luak lieuk ka sabudeureun sawah nu paroek, euweuh lampu atawa obor pikeun nyaangan. Sababaraha kali Ipah tikosewad na galengan, hadena mineng muntang ka Ustad Amar.
"Duh punten Kang ustad nya!" Ipah kaeraan.
Nepi ka buruan imah Sari, kaayaan paroek jeung simpe. Dina tetempoan Ipah mah lain imah tapi guha anu dibeulit ku akar caringin nahun. Akar gantungna ngarambat matak hieum. Ustad Amar ngabedega hareupeun lawang guha, bari ngaluarkeun Al-Qur'an leutik.
"Teteh, calik wae bari ngadu'a, InsyaAllah du'a indung keur anakna diijabah ku Alloh. Masing yakin, puserkeun ka Wiwin, ulah hariwang, nu tahlil ge sami ngadu'akeun kasalametan Wiwin katut Kang Didin!" Ustad Amar papagah.
Ipah unggeuk, rada anggang ti palebah nangtung Ustad Amar, diuk bari nyerangkeun imah Sari.
Dimimitian ku surat Alfatihah, Ustad Amar khusu ngaji bari curukna diarahkeun ka guha. Tamat sasurat, kadenge aya sora ngaguruh ti jero guha, Ipah ampir kapangaruhan pegat wirid, ngan sakolepat Wiwin nembongan keur pada ngarejeng. Ipah ngawirid deui beuki manteng.
Ti jero guha kaluar haseup bodas, mulek mangrupa awak awewe, lila-lila haseup beuki kandel, jleg ngajangelek jadi Sari, wujudna pikagilaeun, awakna jujul ampir sapantar jeung tangkal caringin, buukna panjang ngarumbay nepi kana taneuh, beungeutna mah mangrupa jelema, ngan pias taya getihan.
"Rek naon anjeun? Ngaganggu imah kaula!" Sari molotot, leungeuna nu ranggoas, kukuna paranjang bari sareukeut lir peso balati, ngaragamang kana beuheung Amar. Ngan acan ge antel kana beuheung, Sari ngagoak, nepi ka awakna ngajengkang. Amar angger manteng ka Gusti Nu Maha Suci, Qur'an teu pegat dibaca, bari curuk angger diarahkeun ka Sari.
Awak Sari ngaleutikan, saukuran jelema biasa. Pek robah jadi Wiwin, Ipah nu nyaksian nguniang rek hudang bakuna mah hayang nyampeurkeun, ngan dikodeuan ku Amar, sangkan angger diuk bari ngadu'a. Ipah ngarandeg, gek diuk deui, nuluykeun wiridan.
Sari nyakakak seuri jiga nu ngahaja sangkan Amar jeung Ipah kabagi konsentrasina, ngarah babari ngelehkeun elmu Ustad Amar.
"Ipah! Kaula nyaho anjeun indungna Wiwin, ku Kuring awak Wiwin rek dipake males kanyeri kuring ka kulawarga Juragan Karta!" Ceuk Sari.
"Anjeun ngan saukur setan nu nginjeum ngaran Sari pikeun males kanyeri! Sari mah geus pasrah, rido! Naha Anjeun pipilueun?" Amar eureun heula ngajina.
"Aya manusa jiga Karta, nu boga perjangjian jeung bangsa kami, geus sulaya! Ayeuna katurunan manehna anu ngasaan amisna, sumpah kaula katurunan Karta bakal tumpur! Anak incuna teu nyahoeun, timana harta banda anu ayeuna diwariskeun ka maranehanana, kaula menta wadal parawan! Karta sulaya, geus dipiheulaan manten." Ceuk Sari bari ngageuleuyeung ngurilingan Amar.
Belum ada tanggapan untuk "Rarabi Jeung Nyi Sari (Bag 12)"
Post a Comment
Dilarang membagikan link judi, pornografi, narkoba, dan kekerasan. Terimakasih.