Rarabi_Jeung_Nyi_Sari (Eps 2)
Karya: Ceu Ningsih
"Bapaaa! Gugah atuh ih!" Wiwin budak Didin nginghak bari ngusapan buuk bapana.
"Keun Win, geus eling bapa mah! Can kumpul lelembutan!" Ma Ojoh, ninina ngupahan.
Teu lila Didin ngulisik, bray panonna beunta ret ka sabudeureunana. Kasampak keur dirariung ku indung bapana jeung budakna.
"Allhamdulillah Sujang, geus eling nyah?" Ma Ojoh hariweusweus.
"Di mana ieu teh?" Didin keukeureuceuman, serab ku lampu.
"Di imah Jang! Aya nu nganteurkeun kana delman, ngan embungeun dibayar, teu ngomong teu naon, ngaleos weh!" Ceuk Bah Rukma bapana Didin.
Didin hareneg, bari nginget-nginget kajadian tadi, saha nu nganteurkeun? Saha jalma nu tadi numpak delman? Nyi Sari? Juragan Karta? Urang mana?
"Lalaki awewe nu nganteurkeun teh Ma?" Didin nguniang hudang, nyarande kana bilik kamar.
"Awewe, geulis, make kabaya! Jaman kiwari aya keneh nu make kabaya jiga jaman baheula!" Tembal Ma Jojoh ngasongkeun cai sagelas ka Didin.
Didin nampanan gelas, regot caina diinum nepi ka beak satengahna, "Saha nya?" Didin ngaharewos.
"Bapa cuti nya? Ka pasar nya, Wiwin hayang sapatu keur sakola!" Wiwin ngalendean ka bapana.
"Heg, isukan nya!" Tembal Didin bari ngusapan buuk budak, ret kana jam, horeng geus janari.
"Din, geura rarabi deui atuh! Karunya budak, kamari basa dibagi rapot ge ceurik pedah nempo baturna jeung indungna!" Ceuk Ma Jojoh.
Didin ukur keom, lain teu hayang ngarumah tangga deui, ngan sieun teu nyaaheun ka budak. Katambah ginggiapeun keneh ku kajadian mangsa ka tukang nu geus neundeun raheut jeung kanyeri nu moal bisa laas iraha wae.
Baheula basa Wiwin karek nincak sataun, Didin papisahan jeung indung budak. Mun inget kana kajadian eta, sok rajeun embung panggih atawa deukeut ka nu ngarana awewe, mun teu ras ka indung anu sarua awewe, aya bahan awewe di dunya ieu asa hayang ditumpurkeun bakating ku nyeri hate.
Mun harita nu tinggaleun teh lain barang nu penting, nyaho bakal meunang kapeurih mah, teu sudi balik deui ka imah. Kajeun teu nyaho weh. Geus naek beus, karek maju sakiloan kartu pengenal paragi ngabsen di pabrik tinggaleun di imah. Biasana sok langsung dikongkorongkeun ngarah teu murag. Peutingna dicoo ku budak, les kapopohokeun.
Turun deui tina beus, megat ojeg balik ka imah.
"Dagoan Jang! Sakeudeung da aya nu tinggaleun!" Ceuk Didin.
Tukang ojeg unggeuk, mareuman mesin motor. Didin leumpang mapay galengan muru ka imahna nu nenggang sisi sawah. Nepi ka golodog rada ngarandeg, imah paroek padahal lampu sok dipareuman jam genep, da budak sok ngadat ari paroek teh. Ngong teh adan Subuh, Didin ngoreleng ka pipir, panto dapur teu dikonci, asup ka dapur sarua paroek, bray dicaangan. Gebeg reuwas nempo aya sendal sarampasan laledok ku leutak.
Hatena mimiti tugenah, hanjat ka tengah imah, lampu dicaangan, dina meja aya roko ngebul keneh balatak na asbak. Sidik pisan lain urut manehna, da tara ngaroko tisaprak budak keuna ispa alatan haseup roko.
Gidig ka kamar, bray muka hordeng, seak awak karasa panas, ngagidir nahan amarah, nempo pamajikan keur dikeukeupan, digalentoran ku lalaki sejen.
"Setaaaann!" Didin ngagorowok, ngajewang halu. Geus rek sahabekna halu diteunggeulkeun ka duanana, hadena dibere eling, ras ka budak, mun seug
Nu keur digalentoran ngorejat, lalakina disurungkeun bari kaayaan awak teu katutup ku nanaon. Gancang si lalakina ngajewang simbut bari ngudupung ampun-ampunan.
"Ampuun Kang! Ipah tong dikukumaha, abdi nu salah!" Cenah.
Didin teu mirosea, budak nu keur ngageubra dirawu, dibulen ku simbut. Ret ka Ipah pamajikanana, ku Didin diciduhan nepi ka beungeutna lamokot. Teu loba carita, gancang kaluar ti imah bari ngais budak. Mapay galengan bari cipanon murubut, enya ge pangawakan lalaki, ari kapanggih baseuh mah pamajikan salingkuh, angger hate rajet asa diwewejet.
Ti harita, teu nincak deui ka imah eta. Budak langsung dibawa ka lembur indungna, beberes surat talak ge ngahaja muruhkeun, kajeun ucul duit, geus teu hayang nempo nu ngarana Si Ipah. Mun seug langit aya dua hayang misah ulah salangit jeung jelema nu ngahianat.
Kungsi cenah Ipah nyusulan budak hayang panggih, ngan nepi ka kiwari teu diamprokeun. Geus make surat perjangjian, hak asuh sapinuhna dicepeng ku Didin.
Belum ada tanggapan untuk "Rarabi Jeung Nyi Sari (Bag 2)"
Post a Comment
Dilarang membagikan link judi, pornografi, narkoba, dan kekerasan. Terimakasih.