Rarabi Jeung Nyi Sari Part 10
Karya: Ceu Ningsih
"Teh bapa wengi ieu uih! Biasana Teh Aisyah mah sok mayunan uih, Teh Ipah mah ulah nya!" Wiwin nyampeurkeun ka Ipah nu keur diuk di tepas pasosore.
"Wiwin ngiring ka Teteh yu! Da enjing sakola libur!" Ceuk Ipah.
"Wawartos heula ka Bapa atuh!" Tembal Wiwin bari gek diuk di gigireun Ipah.
"Enya heg! Aeh ari Bu Sari ayana wengi hungkul nya? Naha teu aya liburan damelna?" Ipah asa kajalanan hayang nyaho ti Wiwin, kumaha sapopoena Sari di imah.
"Aneh Wiwin ge, siang tara aya di bumi, pendakna wengi hungkul. Sakapeung di bumi teh asa kareueung." Wiwin neuteup ka buruan imahna, jiga nu hayang ngejat ngan jiga aya nu ngahalangan.
Ipah ngahuleng, sabisa-bisa neangan tarekah sangkan Wiwin bisa ingkah ti ieu imah. Nempo Sari lain jalma sajati tapi jurig nu nyiliwuri, sok sieun ngarogahala ka Wiwin, keun bae bapana mah da geus kolot. Eta we budak, manglebarkeun.
Wiwin menta panggorengkeun endog, Ipah ngoreleng ka dapur, ngaliwatan kamar nu boga imah, panasaran hayang nyaho di jerona, tisaprak unggah ka imah, can luha loho ka kamar nu sejen ari lain kamar Wiwin mah.
Pantona teu dikonci, bray dibuka, panon Ipah rancingeus nitenan kaayaan kamar, hordengna narutup, lampu poek, hieum jiga nu euweuh hawa. Aya nu aneh, di jero kamar barala jiga nu teu disapuan. Ipah ngagebeg nempo nu ngaringkuk di luhur ranjang nu buni ku kulambu carang, kaen kulambu geus kucel sawareh saroek.
Ipah ngeteyep, les weh poho dititah ngagoreng endog ku Wiwin. Kulambu dibuka lalaunan, kaangseu bau hangru matak murel. Nu ngaringkuk teu usik-usik jiga gebog cau. Ipah nungkup irungna, palebah suku nu ngaringkuk simbutna disingkabkeun, barang bray dibuka, Ipah meh ngajerit nempo rorongkong suku nu dilimpudan ku bilatung sagede indung suku.
"Gustiii!" Ipah soak, gancang kaluar ti kamar, panto ditutupan deui, ambekan ngahegak bari kesang ngagarajag. Kasampak di tengah imah Wiwin keur dihuapan ku Sari. Ipah olohok, ras ka nu keur ngaringkuk, ret ka Sari nu keur melongkeun bari seuri sinis.
"Beres sasapu di kamarna Teh?" Sari nyengir matak kukurayeun.
Ipah teu nembalan, ret ka Wiwin gentak budak dijewang, ngan ku Sari dicekel pageuh bari molotot. Ipah meureudeuy, malik mencrong bari babacaan sabisa-bisa.
"Win, ngiring ka Teteh yu!" Ipah neuteup Wiwin.
"Ulah Win, bisi diculik! Di dieu jeung Mamah, tong percaya ka jalma anyar pinanggih!" Sari ngepeskeun leungeun Ipah.
Wiwin bingung, ret ka Sari jeung ka Ipah, "Mamah? Teh Ipah?" Wiwin gegerendengan.
"Ari sabenerna teh anjeun saha? Aya maksud naon datang ka imah ieu?"Sari mencrong ka Ipah.
"Kuring geus nyaho saha anjeun, leuwih hade mun Wiwin ingkah ti dieu! Anjeun mah lain manusa!" Ipah sarua ngaharewos bisi kadengeeun ku Wiwin.
Sari molotot, asa kanyahoan jati dirina. Paur Ipah wawar ka nu sejen, nyaritakeun yen dirina lain manusa, geus tangtu bakal diusir, disinglar sina ingkah. Rek males kanyeri ka kulawarga Juragan Karta bakal kahalangan, heg kari salengkah deui Sari bisa ngawujud jadi manusa sajati.
"Anak Kuring moal ingkah, anjeun nu bakal ingkah salilana ti ieu dunya, mun wani ngahalangan tujuan Kuring!" Sari ngancam, leungeunna nu heuras lir linggis jeung karasa tiis jiga es, nyepeng pageuh leungeun Ipah.
"Kuring nu leuwih hak mawa Wiwin, sabab kuring,,!" Ipah teu kebat nyarita, di luar kadenge nu ngetrokan panto bari gegeroan ka Wiwin.
"Bapa datang Mah!" Wiwin curinghak, lumpat muru panto rek mapag bapana.
Hate Ipah seseblakan, mun Didin nyahoeun, pasti bakal diusir ti imah, niat rek mawa indit Wiwin bakal bolay manten. Gancang Ipah ngaleos, moal amitan rek ka lembur heula ngabejaan Bah Rukma jeung Ma Jojoh, sakalian menta tulung ka nu bisa nyareatan sangkan Wiwin bisa ingkah ti imah eya kalayan salamet.
Ipah nulis surat, diteundeun di kamar Wiwin, rada reugreug ninggalkeun sabab aya bapana, piraku teu nyaah kabudak, mun budak nepi ka kumaha onam kacida lamun nu jadi bapana teu ngajagaan anak. Sanggeus nulis surat, Ipah ngeteyep jalan dapur, bras ka pipir, kebat ka galengan sawah satengah lumpat. Geus aya lima meteran jauhna ti imah, Ipah ngalieuk ka palebah imah, gebeg reuwas kareureuhnakeun, tetempoan lain imah, tapi tangkal caringin gede di sakurilingna sawah, horeng imah teh ti kajauhan mah pasir leutik ngan tara aya nu nincak ka dinya, iwal ti nu sok ngagarap sawah. Ipah istighfar sababaraha kali, muntang ka nu Kawasa sangkan Wiwin ditangtayungan.
Leumpang bari pikiran teu paruguh, teu karasa geus rek wanci sareupna. Sababaraha kali Ipah ngalieukan ka tukang, rarasaan aya nu nuturkeun. Ngan unggal dilieuk euweuh sasaha. Ipah ngahaja mengkol ka handapeun tangkal nangka nu rada hieum. Bari hate ratug, Ipah nyidikeun saha nu nunutur.
"Ipah!" Sora lalaki ngagareuwahkeun.
Ipah ngalieuk, "Kang Didin?"
"Pah! Rek nanahaon datang ka imah, make api-api jadi alona Aisyah? Rek nyulik Wiwin?" Didin muncereng nempo beungeut popotonganana.
Ipah ngarenghap rada jero, tisaprak papisah jeung Didin, kakara ayeuna panggih deui, "abdi indungna boga hak mikanyaah ka Wiwin. Sanajan ceuk hukum, abdi teu pantes ngasuh, getih abdi aya dina awak Wiwin. Moal laas ku hukum jijieunan manusa. Mangtaun-taun mikasono, hayang panggih naja ukur saliwat, harepan can tinekanan, kari-kari ayeuna panggih dina kaayaan nu warurat!"
"Warurat kumaha? Hadena Wiwin teu nyahoeun maneh indung tegesna, mun nyahoeun moal daek ngaku boga indung,,,!" Didin teu nuluykeun omonganana.
"Tukang salingkuh, awewe bangor, teu satia! Rucah! Enya abdi ngaku dosa abdi loba, ka salaki ka anak, ngan abdi ge manusa nu boga hak ngomean diri sorangan!" Ipah ngeluk, ngarumasakeun sorangan.
"Geus tobat nyah? Mun enya geus tobat, naha make rek ngarogahala Wiwin? Paingan balik teu bebeja da sieun kapanggih! Dasar awewe teu eucreug!" Didin kekerot nahan amarah, kajadian mangsa katukang narembongan deui.
"Ngarogahala kumaha Kang? Abdi enya ge rumasa loba dosa, ngan ka anak mah moal luas! Komo ieu kakara panggih deui!" Ipah kerung, moal salah Sari nu ngadu, ngagogoreng Ipah pedah kanyahoan jati dirina.
"Indungna nu bebeja, mun teu kanyahoan mah Wiwin rek diracun!" Ceuk Didin teugeug.
"Kela, abdi indungna! Lain jurig eta, jurig nu nyiliwuri, sahade-hadena jurig, angger niatna mah rek nyilakakeun!" Walon Ipah.
"Jurig? Saha nu jurig?" Peureup Didin geus buleud rek ngahanca beungeut Ipah.
"Aww! Tulung!" Ipah meureudeuy.
Sora Ipah nu ngagoak kadenge ku urang dinya, antukna rabul daratang pada ngadeugdeug.
"Aya naon ieu?" Salah saurang nyampeurkeun melong ka Didin.
"Teu nanaon Kang!" Didin rada leler nempo jalma rajol.
Ipah ukur seuri maur, ku Didin leungeuna dijewang dibawa nyingkur, "awas mun datang deui ka imah! Dilaporkeun ka pulisi!" Didin teu kireum-kireum.
"Sok laporkeun! Teu sieun!" Ceuk Ipah, laju ngabengbeos muru ka lembur bari teu nolih ka Didin nu nahan ambek.
Ipah ngagedig, ngarep-ngarep aya ojeg ngaliwat, ngarah tereh ka imah Bah Rukma, rek dipuntangan tulung nyalametkeun Wiwin, bisi Sari kaburu ngawujud jadi manusa sajati, tangtu Ipah bakal papisah deui jeung Wiwin.
Bari ngahegak, Ipah nyimpang heula ka imahna, mandi jeung solat. Ti dinya mah naek ojeg ka Imah Bah Rukma. Sanajan cape tas leumpang bari pikiran tagiwur, geus jadi patekadan nu buleud rek nyalametkeun nu jadi anak ti jurig nu nyiliwuri.
Belum ada tanggapan untuk "Rarabi Jeung Nyi Sari (Bag 10)"
Post a Comment
Dilarang membagikan link judi, pornografi, narkoba, dan kekerasan. Terimakasih.